අපදාවට පත් ජනතාව වෙනුවෙන් කැප වී කටයුතු කරන ත්රිවිධ හමුදාව, පොලිසිය, රාජ්ය නිලධාරීන්, ස්වේච්ඡා සංවිධාන වගේම ජනතාවටත්, සියලු විදේශිය රටවලටත් රජයේ ස්තුතිය පිරිනමනවා.
ආපදාවෙන් අවතැන් වූ සියලු ජනතාවට ඔවුන්ගේ ජීවිත යළි නගාසිටුවීම සඳහා හැකි සෑම සහයෝගයක්ම ලබාදෙන බවත්, අපදාවට පත් ජනතාව වෙනුවෙන් කැප වී කටයුතු කරන ත්රිවිධ හමුදාව, පොලිසිය, රාජ්ය නිලධාරීන්, ස්වේච්ඡා සංවිධානවලට මෙන්ම මේ රටේ ජනතාවට සහ සියලු විදේශිය රටවලටත් රජයේ ස්තුතිය පිරිනමන බව අග්රාමාත්ය ආචාර්ය හරිනි අමරසූරිය පැවසුවාය.
රට තුළ ඇති වූ හදිසි ආපදාතත්ත්වය පිළිබඳ අද (03) පාර්ලිමේන්තුවේ අදහස් දක්වමින් අග්රාමාතය තුමිය මේ බව සඳහන් කළාය.
මෙහිදී වැඩි දුරටත් අදහස් දැක් වූ අග්රාමාත්ය ආචාර්ය හරිනි අමරසූරිය මෙසේද කීවාය.
අපේ රටේ ඉතිහාසයේ ඇතිවූ විශාලතම විපත් වලින් දරුණුම එකකට පසුගිය දින කිහිපය තුළ, අපට මුහුණදීමට සිදු වුණා. මේ විපතින් ජීවිත අහිමිවූණු, අවතැන්වුණු, දේපළ හානි සිදුවුණු සහ විවිධ අයුරින් විපතට පත්වූ සියලුම සහෝදර ජනතාව වෙත පළමුවෙන්ම මගේ සාතිශය සංවේගය පළකරනවා.
මේ ආපදාවෙන් නිවෙස්, ව්යාපාර, දේපල අහිමි ව අවතැන් වූ සියලු ජනතාවට ඔවුන්ගේ ජීවිත යළි නගාසිටුවීම උදෙසා රජයක් ලෙස කළ හැකි සෑම සහයෝගයක්ම ලබාදෙන බවත් මම මේ මොහොතේ සඳහන් කරන්න කැමතියි.
ඒ වගේම පසුගිය දින කිහිපය පුරා විශේෂයෙන්, අපේ රටේ රාජ්ය නිලධාරීන් සහ මහජන නියෝජිතයින් දැඩි වෙහෙසක් ගනිමින් විපතට පත්වූ අපේම සහෝදර ජනතාව ඉන් මුදවා ගැනීම සහ ඔවුන්ට සහන සැලසීම වෙනුවෙන් තමන්ගේ උපරිම දායකත්වය ලබා දුන්නා. රාජ්ය නිලධාරීන් සමග එක්ව මේ කටයුත්තට උරදුන් (ආණ්ඩු පක්ෂ සහ විපක්ෂ) මහජන නියෝජිතයින් සියලු දෙනාටමත් මම මගේ විශේෂ ස්තුතිය පිරිනමන්න කැමතියි. විශේෂයෙන් මෙම අභියෝගයට මුහුණ දීමේදී , අපේ ජනතාව අතර තිබෙන එකමුතුකම, ධෛර්යය, කරුණාව, සහකම්පනය, එකිනෙකාට උදවු කරගැනීම වගේ ගුණාංග අපට දකින්න ලැබුණා. එය අපට මේ මෙහෙයුම ඉදිරියට ගෙනයාමට තව තවත් ශක්තියක් වනවා.
මෙම අපදාවෙන් අනතුරට පත්වූ සහෝදර ජනතාව මුදවා ගැනීමටත්, ඔවුන්ව ආරක්ෂිත ස්ථාන වෙතගෙනයාමටත් දැඩි ලෙස වෙහෙසී කටයුතු කළ, තවමත් ඒ මෙහෙයුමේ රැඳී සිටින ශ්රී ලංකා යුද්ධ හමුදාව, නාවික හමුදාව, ගුවන් හමුදාව, පොලීසිය, ඇතුළු රාජ්ය නිලධාරීන්, හා සියලුම හදිසි සහන කණ්ඩායම් වෙත මම මගේ ආචාරය පුදකරන්න කැමතියි.ඒ වගේම තවත් අයෙකුගේ ජීවිතය බේරා ගැනීමට තමන්ගේ ජීවිතය බිළි දුන් අවස්ථාත් තිබෙනවා, එය පහසුවෙන් දකින්න නොලැබෙන වීරත්වයක්. ඒ සියළු දෙනාම නැවත නැවතත් මම ගෞරවයෙන් සිහිපත් කරනවා. ඒ වගේම මුදාගැනීමේ මෙහෙයුම් අතරතුර වෙන්නප්පුව ලුණුවිල ගින් ඔයේදී අනතුරකට ලක්වූ ශ්රී ලංකා ගුවන් හමුදාවට අයත් Bell 212 හෙලිකොප්ටර් යානයේ සිටි ගුවන් නියමු Wing Commander නිර්මල සියඹලාපිටියට වගේම ගංවතුර පාලනය කිරීම සඳහා චුණ්ඩිකුලම් ප්රදේශයේ කලපු මෝය පුළුල් කිරීමේ කටයුතුවල යෙදී සිටියදී අතුරුදන් වූ නාවික හමුදා නිලධාරීන් පස්දෙනාටත් මම මගේ ආචාරය පුදකරනවා. දහස් ගණනක් මිනිසුන්ගේ ජීවිත බේරාගැනීම වෙනුවෙන් තම ජිවිතය පරදුවට තැබූ ඒ වීරත්වය කිසිදා අමතක කළ නොහැකියි.
ඒ වගේම රජයේ ආණ්ඩුකාරවරුන්, දිස්ත්රික් හා ප්රාදේශීය ලේකම්වරුන්, ග්රාම නිලධාරීන්, ප්රාදේශීය පාලන අධිකාරීන්, සහ අත්යවශ්ය සේවා සපයන්නන් ද, මේ දුෂ්කර මොහොතේ සෘජුවම ක්ෂේත්රයේ සිට ක්රියාත්මක වනවා. ඔවුන්ගේ සේවයත් විශේෂයෙන් අගය කළ යුතුයි.
ඒ වගේම විශේෂ ආපදා කළමනාකරණ මධ්යස්ථානය, රජයේ මිනින්දෝරු දෙපාර්තමේන්තුව, දුරකථන සේවා සමාගම් වල කාර්ය මණ්ඩලය, ලංකා විදුලිබල මණ්ඩලය, ජලසම්පාදන හා ජලාපවහන මණ්ඩලය යන ආයතන වල ආයතන ප්රධානීන් සහ සේවක මහත්ම මහත්මීන් වෙත මම මගේ විශේෂ ස්තූතිය පිරිනමනවා.. ඔවුන් අත්යවශ්ය සේවා නැවත ස්ථාපිත කිරීම සදහා දැඩි කැපවීමකින් ක්රියා කරනවා.
අපේ සෞඛ්ය ක්ෂේත්රය, වෛද්යවරු, හෙද නිලධාරීන්, රෝහල් කාර්ය මණ්ඩලය, මහජන සෞඛ්ය පරීක්ෂක නිලධාරීන්, Midwife ලා සහ ප්රජා සෞඛ්ය සේවකයන්ට ඔවුන්ගේ දැඩි කැපවීම වෙනුවෙන් මම මගේ ගෞරවය පිරිනමන්න කැමතියි.
ඒ වගේම විශේෂයෙන් සිහිපත් කළ යුතුයි, මේ මොහොතේ විපතට පත්වූවන් වෙනුවෙන් නොයෙක් ආකාරයෙන් උපකාර කිරීම සඳහා ඉදිරිපත් වන ස්වෙච්චා කණ්ඩායම්, තරුණ කණ්ඩායම්, කාන්තා කණ්ඩායම්, නොයෙක් තරුණ සමූහයන් සහ සංවිධාන, ආගමික ආයතන. මේ සියලු දෙනාම කිසිදු ලාභ ප්රයෝජනයක් නොතකා විපතට පත්වූවන් වෙනුවෙන් තම දායකත්වය ලබාදෙනවා. දින ගණනාවක් තිස්සේ මේ මොහොතේත් ඔවුන් මේ ක්රියාන්විතය වෙනුවෙන් කැපවී ක්රියා කරනවා. රටක් විදිහට, ශ්රී ලාංකික ජාතියක් විදිහට අපට තිබෙන වටිනාම ශක්තිය තමයි මේ මිනිස්කම හඳුනන අනිකා කෙරෙහි සහකම්පනයෙන් යුතු මිනිස් හදවත්. ඒ සියලු දෙනා වෙත මේ මොහොතේ මම මගේ ආචාරය පුදකර සිටිනවා.
ඒ වගේම මේ අභියෝගාත්මක අවස්ථාවේ අප සමග එක්වූ, අපට ශක්තියක් වූ අපේ මිත්ර විදෙස් රටවල් මම විශේෂයෙන් සිහිපත් කරන්න කැමතියි. අපට අවශ්ය නොයෙක් උපකාර කරමින්, අවශ්යතා සොයා බලමින්, අවශ්ය සහන සේවා සැපයීම සඳහා රාජතාන්ත්රික මට්ටමින් මැදිහත් වෙමින් ක්රියාකළ සියලුම විදෙස් රාජ්යන්ට වගේම ඒ රටවල් නියෝජනය කරන විදෙස් දූත මණ්ඩල ප්රධානීන් ඇතුළු නිලධාරීන්ටත් මේ මොහොතේ මම කෘතඥ වනවා. නොයෙක් අයුරින් ශ්රී ලාංකිකයින්ට උපකාර කිරීමට ඉදිරිපත්ව සිටින ජාත්යන්තර සංවිධාන රැසක් සිටීමත් මේ මොහොතේ අපට ශක්තියක්. ඔවුන්වත් මම විශේෂයෙන් සිහිපත් කරනවා.
ඒ වගේම විදෙස්ගතව සේවය කරන සහ විදෙස් රාජ්යයන්හි පදිංචි ශ්රී ලාංකිකයින් සහ ඔවුන්ගේ නොයෙක් සංවිධාන. මේ මොහොතේ තමන්ගේ මාතෘ භුමිය පත්ව තිබෙන ව්යසනය දැකලා, ඔවුන් තම තමන්ගේ ශක්ති ප්රමාණයෙන් මේ රට යළි ගොඩනැගීමටත්, විපතට පත්වූවන්ට දෙපයින් නැගී සිටීම සඳහාත් උපකාර කරමින් සිටිනවා. ලෝකයේ කොතැනක හිටියත් ඛේදවාචකයක් හමුවේ ශ්රී ලංකික සහෝදර ජනතාව වෙනුවෙන් ඒ මැදිහත්වීමට, කැපවීමට සහ සහයෝගයට මම විශේෂයෙන් ඒ සහෝදර ජනතාවට ස්තුතිවන්ත වනවා.
පවතින තත්ත්වය පිළිබඳව නිතරම නිවැරදි තොරතුරු යාවත්කාලින කරන මාධ්යවේදීන්, මාධ්ය ආයතන, සමාජ මාධ්ය ක්රියාකාරීන්, සහ නිවැරදි විශ්වසනීය වගකිම්සහගත තොරතුරු බෙදාහරින පුරවැසියන්ටත් මම ස්තූතිය පළ කරනවා. විපතට පත්වූවන් මුදාගැනීමේ මෙහෙයුම් සඳහා මගපෙන්වීමට, නිවැරදි කළමනාකරණය සිදුකිරීමට වගේම ජනතාව වෙත ආරක්ෂාකාරී ලෙස මගපෙන්වන්නත් ඔවුන්ගේ සේවය අතිශය වැදගත් වනවා. ඒ සමගින් මා සිහිපත් කළ යුතු තවත් විශේෂ දෙයක් තිබෙනවා. ඇතැම් පුද්ගලයින් නොයෙක් වාසි වෙනුවෙන් මේ මොහොතේත් වැරදි තොරතුරු ප්රචාරය කරමින් සිටින බව අපට දකින්න තිබෙනවා. ඒ සියල්ල කළමනාකරණය කරගැනීමටත් වගකීම් සහගතව නිවැරදි තොරතුරු බෙදාගන්නා ඔබේ සේවය අපට අතිශය වැදගත් වනවා.
ඒ වගේම මෙම හදිසි අවස්ථාව තුළ සෑම අංශයක්ම සම්බන්ධීකරණය කළ අධ්යාපන අමාත්යාංශයේ ලේකම්වරයාට මගේ හෘදයාංගම ස්තූතිය පළ කරනවා.
විභාග කොමසාරිස් ජනරාල්තුමියට, නියෝජ්ය කොමසාරිස් ජනරාල්වරුන්ට සහ විභාග දෙපාර්තමේන්තුවේ සම්ස්ත කාර්ය මණ්ඩලයට ද මගේ කෘතඥතාව පළ කරනවා. විභාග පත්රිකා ආරක්ෂා කිරීමට, සම්පූර්ණ කරන ලද පිළිතුරු පත්ර ආරක්ෂා කිරීමට, විභාග මධ්යස්ථාන සුරක්ෂිත කිරීමට සහ විභාග ක්රියාවලියේ අඛණ්ඩතාව පවත්වා ගැනීමට, ඉතාමත් දුෂ්කර තත්ත්වයන් යටතේ වුවද ඔවුන් දරන නොපසුබට උත්සාහය ඔවුන්ගේ වෘත්තීයභාවය සහ කැපවීම පිළිබඳ සැබෑ සාක්ෂියක් වනවා.
මේ අවස්ථාවේ මම සිහිපත් කළ යුතුයි තලවකැලේ සුමන මහා විද්යාලයේ පවත්වාගෙන යන ප්රාදේශීය එක් රැස් කිරීමේ මධ්යස්ථානයේ සහකාර සම්බන්ධීකරණ නිලධාරිතුමා රාජකාරියේ නිරතව සිටියදී ඔහුගේ පවුලේ බිරිද, දරුවන් ඇතුළු සියලු දෙනා එම ප්රදේශයේ සිදු වූ නාය යාම හේතුවෙන් ජීවිතක්ෂයට පත් වුණා. එය ඉතා සංවේගජනක සිදුවීමක්.
ඒ හා සමානව, අපගේ පාසල් ආරක්ෂා කිරීමට, බලපෑමට ලක් වූ පවුල්වලට සහාය වීමට සහ විභාග කටයුතු බාධාවකින් තොරව සිදු කරන බව සහතික කිරීමට දිවා රෑ නොබලා වැඩ කළ ගුරු - විදුහල්පති සහ කාර්ය මණ්ඩලය, පළාත් අධ්යාපන ලේකම්වරුන්ට, පළාත් අධ්යාපන අධ්යක්ෂවරුන්ට සහ සියලුම පළාත් සහ දිස්ත්රික් අධ්යාපන බලධාරීන්ට මම මගේ අවංක කෘතඥතාව පළ කරනවා. අපදාව මධ්යයේ වුවද, ඔබගේ කැපවීම ආදර්ශමත් වනවා.
සහන කටයුතු සම්බන්ධීකරණය කළ, වේගවත්ව සන්නිවේදනය කරමින් තොරතුරු කළමනාකරණය කළ සහ සෑම අභියෝගයකටම ක්ෂණිකව ප්රතිචාර දැක්වූ විභාග දෙපාර්තමේන්තුවේ සහ අධ්යාපන අමාත්යාංශයේ කාර්ය මණ්ඩලය මගේ ගෞරවය පුද කරනවා.
උසස් අධ්යාපන අංශයේ, වෘත්තීය අධ්යාපන අංශයේ සහ සියලුම අනුබද්ධ ආයතනවල ආයතන ප්රධානීන්ට සහ කාර්ය මණ්ඩලයට සිය දායකත්වය වෙනුවෙන් මම ස්තූතිවන්ත වෙනවා. මෙම අර්බුදය තුළ සම්පත්, පහසුකම් සහ පුහුණු කාර්ය මණ්ඩලය සැපයීමට ඔබගේ සහයෝගය, නම්යශීලීභාවය සහ සූදානම සැබෑ ජාතික සහයෝගීතාවය පිළිබිඹු කරනවා. ඒ වගේම විශේෂයෙන් මතක් කළ යුතුයි විශ්වවිද්යාලවල සහ උසස් අධ්යාපන ආයතනවල ශිෂ්ය සංගම් නියෝජිතයින් දැක්වූ සහයෝගය පිළිබඳව.
මෙම කාල පරිච්ඡේදය තුළ අප දැරූ වැදගත්ම වගකීමක් වූයේ අපගේ සිසුන්ට අඛණ්ඩ අධ්යාපනය සහතික කිරීම සහ මානසිකව ඔවුන් යථාවත් කිරීමයි. ඒ සඳහා ඔබ සියලු දෙනාගේම සහයෝගය ඉදිරියටත් බලාපොරොත්තු වෙනවා. ඒ සඳහා රජයක් ලෙස අප වගකීම් සහගතව පෙනී සිටිනවා
අමාත්යාංශ, දිස්ත්රික්ක, පළාත්, පාසල් සහ විශ්ව විද්යාල හරහා සිදු කරන මෙම සාමූහික උත්සාහය විසින් අපේ අධ්යාපන පද්ධතිය හුදෙක් පද්ධතියක් පමණක් නොව එකම පවුලක් බව ඔප්පු කරනවා. අධ්යාපන අමාත්යවරයා වශයෙන්, මෙම දැවැන්ත ජාතික කර්තව්යයට දායක වූ සෑම පුද්ගලයෙකුම මම අගය කරනවා.
සැමවිටම අප පවසන පරිදි, අපේ ශක්තිය අපේ රටේ පුරවැසියන්. ඔවුන්ගේ සුවිශේෂී කාරුණික හදවත්. අනිකා වෙනුවෙන් සහකම්පනයෙන් යුතුව ඕනෑම අභියෝගයකට මුහුණදෙන උදාර මිනිස්කම් සහිත ඒ පුරවැසියන්ගේ හදවත් ගැන අපි නැවත නැවතත් ආඩම්බර වෙනවා. මහා විපතක් ඉදිරියේත්, ප්රාණවත්ව, සක්රියව, මිනිසත්කමින් යුතුව, කාරුණිකව වෙහෙසෙන ඒ සියල්ලන් රටක් වශයෙන් අපේ ශක්තිය කුමක්දැයි මුළු ලොවටම කියා දෙමින් සිටිනවා.
තමන්ගේ සියලු අසීරුතාවයන් අතරත් “මම මට පුළුවන් දෙයක් දෙනවා” කියමින් පැමිණ පැනඩොල් පැකට් දෙකක් පරිත්යාග කළ ඒ “අම්මා”ගේ සහකම්පනය, අපේ ජාතියේ කරුණාව, උදාරකම, සහ එකමුතුකම මනාව පෙන්වන උදාහරණයක්.
මේක අසීරු මොහොතක්. අසීරුවෙන් ජයගත යුතු අභියෝගාත්මක ගමනක් අප ඉදිරියේ තිබෙනවා. එකිනෙකා කෙරෙහි කරුණාවෙන්, ආදරයෙන්, සහ අවබෝධයෙන් කටයුතු කිරීම මේ මොහොතේ අත්යවශ්යයි. ජීවිත අහිමිවූ සියල්ලන් වෙනුවෙන් අපේ හදවත් වල නැගෙන වේදනාව සහ කම්පනය කිසිදා අපේ හදවතින් ඈත් නොවේවි. නමුත් අපි ඉදිරියට යායුතුමයි. මේ දැවැන්ත ව්යසනයෙන් හිස ඔසවා නැගී සිටිය යුතුමයි. එකමුතුකමින්, ධෛර්යයෙන්, අලුත් ආකල්පවලින්, යුතුව අලුත් පණක් සහිතව අපි නැගී සිටිය යුතුමයි.
මේ මොහොතේ රජය විසින් ඉටුකරන භාරධුර කාර්යය කෙරෙහි විශ්වාසය තබා ඒ සමග එකතුවන සියලු දෙනාටම මම නැවත වරක් ස්තුතිවන්ත වනවා. ඒ වගේම මේ මොහොතේ සියලු පක්ෂ පාට පසෙක දමා මේ රට යලි ගොඩනැගීම වෙනුවෙන් එකතුවී වැඩ කරමු කියන ඉල්ලීමත් මම මේ මොහොතේ අපේ සියලුම පාර්ලිමේන්තු මන්ත්රීවරුන්ට ඉදිරිපත් කරන්න කැමතියි.
විදුලි බිඳවැටීම්, ජලය සහ ආහාර ලබා ගැනීමේ අපහසුතා ඇතුළු අප්රමාණ බාධා හමුවේත්, ඔබ පෙන්වූ ඉවසීම, අභියෝග වලට මුහුණ දීමේ ශක්තිය, අපේ සමස්ථ ජාතියේම ශක්තිය බව මම තරයේ විශ්වාස කරනවා.
මෙම අසීරු කාලය පුරා, නොයෙක් ආකාරයෙන් ඔබ දැක්වූ දායකත්වයට, ඔබ පෙන්වූ ධෛර්යයට, සහ එකමුතුකම වෙනුවෙන් සිය ගෞරවය සහ ස්තූතිය පළ කරන බවද අග්රාමාත්ය ආචාර්ය හරිනි අමරසූරිය පැවසුවාය.
අග්රාමාත්ය මාධ්ය අංශය
