தாய்லாந்தின் பேங்கொக் நகரில் நடைபெறும் பல்துறை தொழில்நுட்ப மற்றும் பொருளாதார ஒத்துழைப்புக்கான வங்காள விரிகுடா முன்முயற்சி (BIMSTEC) அமைப்பின் 6 ஆவது உச்சி மாநாட்டில் பங்குபற்றும் தலைவர்களுக்கான இராப்போசன விருந்தில் பிரதமர் கலாநிதி ஹரிணி அமரசூரிய நேற்று (03) கலந்து கொண்டார்.

பிம்ஸ்டெக் 6வது உச்சிமாநாடு தாய்லாந்தின் பேங்கொக் நகரில் ஏப்ரல் 4ஆம் திகதி (இன்று) நடைபெறவுள்ளதுடன், அதில் பங்கேற்பதற்காக பிரதமர் கலாநிதி ஹரிணி அமரசூரிய நேற்று பிற்பகல் 5.55 மணிக்கு தாய்லாந்தின் பேங்கொக் நகரில் உள்ள சுவர்ண பூமி விமான நிலையத்தை சென்றடைந்தார்.

மூன்று ஆண்டுகளுக்குப் பின்னர் நடைபெறும் இந்த ஆண்டு BIMSTEC உச்சிமாநாட்டின் கருப்பொருள், "சுபீட்சம், மீளாற்றல் மற்றும் திறந்த தன்மை" என்பதாகும்.

பங்களாதேஷ், பூட்டான், இந்தியா, மியான்மார், நேபாளம், இலங்கை மற்றும் தாய்லாந்து ஆகிய ஏழு உறுப்பு நாடுகளுக்கிடையிலான ஒத்துழைப்பை வலுப்படுத்துவதே BIMSTEC உச்சிமாநாட்டின் நோக்கமாகும்.

பிரதமர் ஊடகப் பிரிவு

தொழிற்கல்வி மற்றும் பொருளாதார உறவுகளை பலப்படுத்துவது குறித்து கலந்துரையாடல்.

அண்மையில் ஜேர்மனியின் ஹம்பேர்க் நகருக்கு உத்தியோகபூர்வ விஜயமொன்றை மேற்கொண்டிருந்த பிரதமர் கலாநிதி ஹரிணி அமரசூரிய தனது பயணத்தின் போது, இரு நாடுகளுக்கும் இடையே தொழிற் கல்வி மற்றும் பொருளாதார கூட்டாண்மையை வலுப்படுத்துவது குறித்து இருதரப்பு கலந்துரையாடல்களை மேற்கொண்டார். இந்த விஜயத்தின் போது, அவர் 102வது கிழக்கு ஆசிய நட்புறவு விருந்துபசாரத்தில் கலந்து கொண்டதுடன், ஜேர்மன் ஜனாதிபதி பிராங்க் வோல்டர் ஸ்டைன்மியரையும் சந்தித்தார். மேலும், முதலீடு, கல்வி மற்றும் பொருளாதார சீர்திருத்தங்கள் குறித்த பல உயர்மட்ட கலந்துரையாடல்களிலும் பிரதமர் பங்கேற்றார்.

ஜேர்மன் ஆசிய பசுபிக் வர்த்தக சங்கத்தின் (OAV) வருடாந்த கூட்டத்தில் கௌரவ அதிதியாக கலந்து கொண்ட பிரதமர், வர்த்தக தலைவர்கள் மற்றும் முக்கியஸ்தர்கள் மத்தியில் உரையாற்றியதுடன், இலங்கையில் பொருளாதார ஸ்திரத்தன்மையை ஏற்படுத்துவதற்கான அரசாங்கத்தின் வேலைத்திட்டம் குறித்தும் கருத்துக்களை வெளியிட்டார். அபிவிருத்தியடைந்து வரும் முதலீட்டு பிராந்தியமாக இலங்கையின் சாத்திய வளங்கள் குறித்தும் அவர் வலியுறுத்தினார். இலங்கையில் இயங்கி வரும் 160க்கும் மேற்பட்ட ஜேர்மன் நிறுவனங்களின் பங்களிப்பைப் பாராட்டிய அவர், வர்த்தகம் மற்றும் வர்த்தகத் துறையில் மேலும் ஒத்துழைப்பைப் பேணுமாறு அவர்களுக்கு அழைப்பு விடுத்தார்.

கல்வி, உயர்கல்வி மற்றும் தொழிற்கல்வி அமைச்சர் என்ற வகையில், ’தொழிற் கல்வி மற்றும் பயிற்சிக்கான ஜெர்மன்-ஆசிய மன்றத்தில்’ பிரதமர் சிறப்புரை ஆற்றினார். இலங்கையில் தொழிற்கல்வித் துறையில் ஜேர்மனியின் பல தசாப்தகால ஆதரவைப் பாராட்டிய அவர், தொழில் வாய்ப்புகளுக்கு ஏற்ப தொழிற்பயிற்சியை நவீனமயமாக்குவதன் முக்கியத்துவத்தை வலியுறுத்தினார். மேலும், ITECH தொழிற்கல்வி பாடசாலை மற்றும் NXP மற்றும் DESY போன்ற ஜெர்மன் ஆராய்ச்சி நிலையங்களுக்கும் விஜயம் செய்த பிரதமர் இரு நாடுகளின் ஒத்துழைப்பு மற்றும் தகவல் தொழிநுட்பம் மற்றும் தொழில்நுட்பம் சார்ந்த கைத்தொழில்களில் புதிய வாய்ப்புகள் குறித்தும் கலந்துரையாடினார்.

ஜேர்மன் ஜனாதிபதி ஸ்டெய்ன்மியருடன் பிரதமர் மேற்கொண்ட கலந்துரையாடலின் போது, நாட்டின் பொருளாதார ஸ்திரத்தன்மை, சமூக பாதுகாப்பு மற்றும் தேசிய ஒருமைப்பாட்டிற்கான அரசாங்கத்தின் உறுதிப்பாட்டை மீண்டும் வலியுறுத்தினார். வர்த்தக வட்டமேசை கலந்துரையாடலொன்றிலும் பங்கேற்ற பிரதமர், ஜெர்மன் நிறுவனங்கள் மற்றும் அரசாங்கப் பிரதிநிதிகளுடன் பொருளாதார விரிவாக்கம், டிஜிட்டல் மயமாக்கல் மற்றும் பேண்தகு அபிவிருத்தி முயற்சிகள் குறித்த கலந்துரையாடல்களில் ஈடுபட்டார்.

இந்த விசேட சந்திப்புகளில் பிரதமருடன் ஜேர்மனிக்கான இலங்கைத் தூதுவர் வருணி முத்துக்குமாரன மற்றும் தூதரகத்தின் சிரேஷ்ட அதிகாரிகளும் கலந்துகொண்டனர்.

பிரதமர் ஊடகப் பிரிவு

’இலங்கையில் உள்ள உலக மரபுரிமை தளமான அனுராதபுரம் புனித நகரத்தைப் பாதுகாப்பதற்கான ஒருங்கிணைந்த மற்றும் நிலைபேறான அணுகுமுறை’ என்ற கருப்பொருளின் கீழ் யுனெஸ்கோ தலைமையகத்தில் நடைபெற்ற சர்வதேச நிபுணர் மாநாட்டில் கலந்து கொண்ட பிரதமர் கலாநிதி ஹரிணி அமரசூரிய, மார்ச் 31 முதல் ஏப்ரல் 2 வரை பிரான்சுக்கான தனது உத்தியோகபூர்வ விஜயத்தின் போது, இருதரப்புத் துறையில் பல்வேறு உயர் மட்ட கலந்துரயாடல்களில் ஈடுபட்டார். பரந்த அளவிலான துறைகளில் இலங்கைக்கும் பிரான்சுக்கும் இடையில் தற்போதுள்ள பன்முக கூட்டாண்மையை மேலும் ஒருங்கிணைக்கும் நோக்கில் இந்த சந்திப்புகள் இடம்பெற்றன.

பிரதமர் ஹரிணி அமரசூரிய, பிரான்சின் முன்னாள் பிரதமரும் தேசிய கல்வி, உயர் கல்வி மற்றும் ஆராய்ச்சிக்கான துணை அமைச்சருமான எலிசபெத் போர்னுடன் 2025 ஏப்ரல் 1 அன்று கல்வி அமைச்சில் ஒரு சந்திப்பை மேற்கொண்டார். கல்வி, உயர் கல்வி மற்றும் தொழில் பயிற்சி; இந்து சமுத்திர ஒத்துழைப்பு; கடல்சார் விவகாரங்கள்; காலநிலை நடவடிக்கை; மற்றும் உயர் மட்ட விஜயங்களின் பரிமாற்றம் உள்ளிட்ட பரஸ்பர நன்மைபயக்கும் துறைகளில் ஒத்துழைப்பை மேம்படுத்துவது குறித்து இந்த கலந்துரையாடல்களின் போது கவனம் செலுத்தப்பட்டது. இலங்கை - பிரான்ஸ் இருதரப்பு உறவுகளில் ஏற்பட்டுள்ள முன்னேற்றத்தை இரு தரப்பினரும் கவனத்தில் கொண்டதுடன், தற்போதுள்ள கூட்டுறவை மேலும் கட்டியெழுப்புவதற்கான பகிர்ந்த ஆர்வத்தையும் மீண்டும் வலியுறுத்தினர்.

பிரான்ஸ் அரசாங்கத்தின் அழைப்பின் பேரில், பிரதமர் அவர்கள் 2025 மார்ச் 31 அன்று Musée de l’Homme இல் Oceano Azul மன்றம் மற்றும் புளூம்பேர்க் மனிதநேய அமைப்பு என்பவற்றுடன் இணைந்து பிரான்ஸ் அரசாங்கத்தால் ஏற்பாடு செய்யப்பட்ட SOS சமுத்திர மாநாட்டின் இறுதி அமர்விலும் கலந்து கொண்டார். மாசுபாடு மற்றும் காலநிலை மாற்றத்தால் உலக சமுத்திரங்கள் முன்னெப்போதும் இல்லாத அச்சுறுத்தல்களை எதிர்கொள்வதால் கடல்களைப் பாதுகாப்பதற்கான செயல் திட்டத்தை உருவாக்கும் நோக்கத்துடன், ஐ.நா. சமுத்திர மாநாட்டிற்கு (UNOC3) முன்னதாக, அரச மற்றும் அரசாங்கத் தலைவர்களின் பங்கேற்புடன் இந்த மாநாடு ஏற்பாடு செய்யப்பட்டது.

இந்த மாநாட்டில் உரையாற்றிய பிரதமர், இந்து சமுத்திரத்தின் மையத்தில் அமைந்துள்ள ஒரு தீவு நாடாக, சமுத்திரப் பாதுகாப்பு, நிலைபேறான கடல் நிர்வாகம்,சூழல் முறைமை மறுசீரமைப்பு மற்றும் மேம்பட்ட பிராந்திய ஒத்துழைப்பு ஆகியவற்றில் இலங்கையின் அசைக்க முடியாத உறுதிப்பாட்டை மீண்டும் உறுதிப்படுத்தினார். உயிர்பல்வகைமைப் பாதுகாப்பு, பிளாஸ்டிக் மாசுபாடு மற்றும் நிலைபேறான மற்றும் மீளாற்றல் கொண்ட நீலப் பொருளாதாரத்தை உருவாக்குவதில் இலங்கையின் மேம்பட்ட பிராந்திய ஒத்துழைப்பை பிரதமர் வலியுறுத்தினார். இந்த ஆண்டு ஜூன் மாதம் நீஸில் நடைபெறவிருக்கும் UNOC3 இல் இலங்கை ஆர்வம் கொண்டிருப்பது பற்றியும் அவர் மீண்டும் வலியுறுத்தினார்.

இந்த மாநாட்டின் போது, பிரான்ஸ் குடியரசின் ஜனாதிபதி இம்மானுவேல் மக்ரோனை சந்தித்து வாழ்த்துகளைப் பரிமாறிக் கொள்ளும் வாய்ப்பும் பிரதமருக்கு கிடைத்தது. இதன்போது பிரான்ஸ் ஜனாதிபதி மக்ரோன் ஜனாதிபதி அனுர குமார திசாநாயக்கவுக்கு தனது வாழ்த்துக்களைத் தெரிவித்தார். மாநாட்டில் ஜனாதிபதி மக்ரோன் நிறைவு தின உரை நிகழ்த்தினார். மொனாக்கோவின் மேன்மை தங்கிய இளவரசர் இரண்டாம் ஆல்பர்ட், சிலியின் முன்னாள் ஜனாதிபதியும் முன்னாள் ஐ.நா. மனித உரிமைகள் உயர் ஸ்தானிகருமான மிஷேல் பச்லெட் மற்றும் ஐரோப்பிய பேரவையின் தலைவர் அன்டோனியோ கோஸ்டா ஆகியோருடனும் பிரதமர் கலந்துரையாடி வாழ்த்துக்களைப் பரிமாறிக் கொண்டார்.

2025 ஏப்ரல் 2அன்று பிரான்ஸ் செனட் சபையில் பிரான்ஸ் - இலங்கை நட்புறவுக் குழுவின் தலைவரினால் பிரதமருக்கு காலை உணவு விருந்து அளிக்கப்பட்டது. பிரதமரை செனட்டிற்கு அன்புடன் வரவேற்ற நட்புறவுக் குழுவின் தலைவர் செனட் சபை உறுப்பினர் வனினா பாவோலி-காகின். பிரான்ஸ் - இலங்கை உறவுகளின் முக்கியத்துவம் குறித்து, குறிப்பாக இந்து சமுத்திர சூழலில், நட்பையும் ஒத்துழைப்பையும் மேலும் மேம்படுத்துவதற்கான வழிகள் குறித்து கலந்துரையாடினார். பெண்கள் மற்றும் சிறுவர் விவகார அமைச்சர் சரோஜா சாவித்திரி போல்ராஜ் தலைமையில் இலங்கை பாராளுமன்றத்தில் இலங்கை - பிரான்ஸ் பாராளுமன்ற நட்புறவுக் குழு அண்மையில் உருவாக்கப்பட்டதை செனட் நட்புறவுக் குழு வரவேற்றது, இக்குழுவின் போசகர் பதவியை பிரதமர் ஹரிணி அமரசூரிய வகிக்கின்றார். இரண்டு பாராளுமன்ற நட்புறவுக் குழுக்களின் பரஸ்பர விஜயங்கள் குறித்தும் கலந்துரையாடப்பட்டது. நட்புறவுக் குழுவைச் சேர்ந்த செனட் சபை உறுப்பினர்களான சில்வி கோய்-சாவென்ட், டேனி வாட்டெப்லெட், டிடியர் மேரி மற்றும் விவெட் லோபஸ் ஆகியோரும் திருமதி பாவோலி-காகினுடன் காலை உணவு சந்திப்பில் கலந்து கொண்டனர்.

இந்த சந்திப்பைத் தொடர்ந்து, பிரதமர் வரலாற்றுச் சிறப்புமிக்க செனட் கட்டிடத்தை (லக்சம்பேர்க் அரண்மனை) உத்தியோகபூர்வமாக பார்வையிட செனட் நட்புறவு குழு ஏற்பாடு செய்திருந்தது, மேலும் வரலாற்றுச் சிறப்புமிக்க செனட் நூலகத்தில் வைக்கப்பட்டுள்ள அதிதிகள் புத்தகத்தில் கையெழுத்திடுமாறு பிரதமருக்கு அழைப்பு விடுக்கப்பட்டது.

புகழ்பெற்ற பிரெஞ்சு பல்கலைக்கழகமான சினெசஸ்போ (ScinecesPo) பல்கலைக்கழகத்தின் அழைப்பின் பேரில், பிரதமர் ஹரிணி அமரசூரிய, "இலங்கைப் பிரதமர் கலாநிதி ஹரிணி அமரசூரியவுடன் 60 நிமிடங்கள்" என்ற தலைப்பில் மாணவர்களுடன் ஒரு கலந்துரையாடல் அமர்விலும் பங்கேற்றார், இந்த நிகழ்வு CNRS ஆராய்ச்சி பணிப்பாளர் மற்றும் CERI பணிப்பாளர் பேராசிரியர் கிறிஸ்டோஃப் ஜாஃப்ரெலோட் அவர்களால் நெறிப்படுத்தப்பட்டது. இந்த நிகழ்வு CERI, SciencesPo இல் உள்ள பாரிஸ் சர்வதேச விவகாரங்களுக்கான கல்லூரி மற்றும் தெற்காசிய திட்டத்தால் ஏற்பாடு செய்யப்பட்டிருந்ததுடன், இலங்கையில் அரசியல் முன்னேற்றங்கள், தெற்காசியாவின் ஜனநாயகம் மற்றும் புவிசார் அரசியல், இலங்கையின் வெளியுறவுக் கொள்கை கடப்பாடுகள், அத்துடன் காலநிலை மாற்றம் மற்றும் புலம்பெயர்வு போன்ற பலதரப்பு பிரச்சினைகள் உள்ளிட்ட தலைப்புகளில் பிரதமருடன் ஆர்வத்துடன் கேள்வி பதில்களில் ஈடுபட்ட 250 க்கும் மேற்பட்ட மாணவர்கள் கலந்து கொண்டனர்.

பிரதமர், சினெசஸ்போ பல்கலைக்கழகத்தின் பணிப்பாளர் லூயிஸ் வாஸியையும் சந்தித்து, கொழும்பு பல்கலைக்கழகம் உட்பட இலங்கைப் பல்கலைக்கழகங்களுக்கும் சினெசஸ்போ (ScinecesPo) பல்கலைக்கழகத்திற்கும் இடையேயான கல்வி ஒத்துழைப்பு குறித்த கலந்துரையாடலில் ஈடுபட்டார். இலங்கை ஆய்வுகள் குறித்த நிபுணரான பாரிஸில் உள்ள இனால்கோவில் (தேசிய கீழைத்தேய மொழிகள் மற்றும் நாகரிகங்கள் நிறுவனம்) வரலாற்றுத் துறை பேராசிரியர் எரிக் மேயருடனும் பிரதமர் கலந்துரையாடினார்.

மேலும் இவ்விஜயத்தின் போது, இலங்கையின் கல்வி, உயர்கல்வி மற்றும் தொழிற்கல்வி அமைச்சுக்கும் பிரான்சின் ஐரோப்பிய மற்றும் வெளியுறவு அமைச்சுக்கும் இடையே, "இலங்கையில் பிரெஞ்சு மொழி கற்பித்தலை மேம்படுத்துவது தொடர்பான பிரான்சின் ஐரோப்பா மற்றும் வெளியுறவு அமைச்சுக்கும் இலங்கையின் கல்வி, உயர்கல்வி மற்றும் தொழிற்கல்வி அமைச்சுக்கும் இடையிலான கூட்டு ஒப்பந்தம்" கைச்சாத்திடப்பட்டது. இந்த ஒப்பந்தத்தின் பின்னணியில் இலங்கையில் பிரெஞ்சு மொழி கற்பிப்பதற்கான ஆதரவு குறித்தும் கலந்துரையாடப்பட்டது.

உலகப் புகழ்பெற்ற ஆசிய கலைத் தொகுப்பைக் கொண்ட பிரெஞ்சு தேசிய ஆசிய கலை அருங்காட்சியகமான மியூசி குய்மெட்டையும் பிரதமர் பார்வையிட்டார். அருங்காட்சியகத்தில் உள்ள இலங்கையின் சில கலைப்பொருட்களையும் காப்பாளர்கள் பிரதமருக்கு காட்டினர்.

பிரதமரின் குழுவில் புத்தசாசன மத மற்றும் கலாசார விவகார அமைச்சர் கலாநிதி ஹினிதும சுனில் செனவி; மத்திய கலாசார நிதியத்தின் பணிப்பாளர் நாயகம் கலாநிதி நிலான் குரே மற்றும் தொல்பொருள் திணைக்களத்தின் பணிப்பாளர் நாயகம் பேராசிரியர் துசித மெண்டிஸ் ஆகியோரும் இடம்பெற்றிருந்தனர். பிரதமருக்கு யுனெஸ்கோவிற்கான இலங்கையின் தூதுவரும் நிரந்தர பிரதிநிதியுமான மனிஷா குணசேகர மற்றும் பிரான்சில் உள்ள இலங்கை தூதரகத்தின் சிரேஷ்ட ஊழியர்கள் உதவினர்.

பிரதமர் ஊடகப் பிரிவு

அனுராதபுரம் இலங்கையின் மாத்திரமன்றி பிரபஞ்சத்தின் சொத்தாகும்.

நாட்டின் வரலாற்று சொத்தான அனுராதபுரம் புனித நகரத்தை பாதுகாப்பதற்கான யுனெஸ்கோவின் தலையீடு பாராட்டுதற்குரியது. அனுராதபுரம் இலங்கைக்கு மாத்திரமன்றி பிரபஞ்சத்தின் சொத்து என பிரதமர் கலாநிதி ஹரினி அமரசூரிய குறிப்பிட்டுள்ளார்.

பிரான்சிலுள்ள யுனெஸ்கோ தலைமையகத்தில் ஏப்ரல் முதலாம் திகதி ’இலங்கையின் உலக மரபுரிமை சொத்தான அனுராதபுரம் புனித நகரத்தை பாதுகாப்பதற்கான ஒன்றிணைந்த மற்றும் நிலையான அணுகுமுறை’ என்ற தொனிப்பொருளில் இடம்பெற்ற சர்வதேச நிபுணர்களின் மாநாட்டில் கலந்துகொண்டு உரையாற்றிய போதே பிரதமர் இதனைத் தெரிவித்துள்ளார்.

இலங்கையுடன் இணைந்து யுனெஸ்கோ ஏற்பாடு செய்திருந்த இந்த மாநாட்டில், கலாசார மற்றும் வரலாற்று முக்கியத்தும்வாய்ந்த UNESCO உலக மரபுரிமை சொத்தான அனுராதபுரத்தை பாதுகாப்பதற்கான நிரந்தர உபாய மார்க்கங்களை கலந்துரையாடும் வகையில் சர்வதேச நிபுணர்களின் பங்கேற்புடன் இந்த மாநாடு இடம்பெற்றது.

இங்கு மேலும் கருத்து தெரிவித்த பிரதமர் கலாநிதி ஹரினி அமரசூரிய இவ்வாறு தெரிவித்தார்.

யுனெஸ்கோ மற்றும் இலங்கைக்கிடையிலான தொடர்புகள் 75 வருடங்களை அண்மிக்கும் தருணத்தில் யுனெஸ்கோ சர்வதேச மாநாட்டில் உரையாற்ற சந்தர்ப்பம் கிடைத்தமை மகிழ்ச்சியளிக்கிறது. ஐக்கிய நாடுகளின் கல்வி, விஞ்ஞான மற்றும் கலாசார அமைப்பின் பணிப்பாளர் நாயகம் ஓத்ரி அசூலே அவர்கள் கடந்த ஜூலை மாதம் இலங்கைக்கு மேற்கொண்டிருந்த விஜயத்தின் பிரதிபலனாக அனுராதபுரத்தை பாதுகாக்கும் வகையில் இந்த மாநாடு இடம்பெறுகிறது.

யுனெஸ்கோ மற்றும் இலங்கைக்கிடையிலான நீண்டகால ஒத்துழைப்பை பலப்படுத்துவதற்கும், கலாசாரங்களுக்கிடையிலான உரையாடல், மரபுரிமைகளை பாதுகாத்தல், கல்வி, நிலைபேறான அபிவிருத்தி மற்றும் தொழில்நுட்ப அபிவிருத்தியை முன்னோக்கி கொண்டு செல்வதற்கும் இந்த மாநாடு கைகொடுக்கும்.

எதிர்கால சந்ததியினருக்கென கலாசார பாரம்பரியத்தை பாதுகாத்து முன்னெடுத்துச் செல்லும் பொறுப்பை பலப்படுத்துவதற்கு உலகளாவிய தலைவராக யுனெஸ்கோவின் ஒத்துழைப்பு இலங்கைக்கு முன்னரை விடவும் மிகவும் அத்தியாவசியமாக தேவைப்படும் காலப்பகுதியில் நாம் உள்ளோம். கலாசாரத்திற்கென முன்னர் இல்லாத மகத்தான வரவேற்பைப் பெறுதல், உலக அமைதி, அபிவிருத்திக்கான அறிவுத்திறன் மற்றும் புத்தாக்கங்களை பயன்படுத்தல், AI தொழில்நுட்பத்தை உயர் நெறிமுறைகளுடன் கையாளுதல், நிலைபேறான கல்வி, சமுத்திர உயிரியல் பல்வகைத்தன்மை மற்றும் பாதுகாப்பு, காலநிலை மாற்றத்திற்கு ஈடுகொடுக்கும் திறனை மேம்படுவதற்காக யுனெஸ்கோ எடுக்கும் நடவடிக்கைகள் மிகவும் முக்கியமானவை என்பதுடன் காலத்திற்கு ஏற்றவை.

கலாசார முக்கோணம் நிறுவப்பட்டுள்ள அனுராதபுரம் மற்றும் பொலன்னறுவை இராச்சியங்களில் காணப்பட்ட மிகவும் முன்னேற்றகரமான நாகரிகம் மற்றும் இயற்கையை பாதுகாப்பதற்கு 1980களிலிருந்து யுனெஸ்கோவின் ஒத்துழைப்பு இலங்கைக்கு கிடைக்கப்பெற்றுள்ளது.

எமது அரசு இனவாதத்தை புறக்கணிக்கிறது. அனைவருக்கும் சமமான உரிமைகளுடன் அனைவரையும் ஒன்றிணைக்கும் சமூகமொன்றை கட்டியெழுப்புவதற்கே அரசாங்கம் முயற்சிக்கிறது. குரோத அரசியல் இலாபங்களுக்கு எதிராகவும், மக்கள் பிளவுபடுவதை விரும்பாதவர்களுமே இந்த தேசிய மரபுரிமைகளை பாதுகாப்பதற்கு அர்ப்பணிப்புடன் செயலாற்றியுள்ளனர்.

எதிர்காலத்தில் இலங்கையின் அனுராதபுரம், யாழ்ப்பாணம் மற்றும் கண்டி ஆகிய 3 நகரங்களையும் தேசிய கலாசார நகரங்களாக அபிவிருத்தி செய்வதற்கு எமது அரசு திட்டமிட்டுள்ளது.

இதேவேளை மியன்மார் மற்றும் தாய்லாந்தில் ஏற்ப்பட்ட நிலநடுக்கத்தினால் உருவாகியுள்ள பேரழிவுகள் தொடர்பில் அந்த நாடுகளின் அரசுகள் மற்றும் மக்களுக்கு இலங்கை ஆழ்ந்த அனுதாபங்களை தெரிவிப்பதாகவும் பிரதமர் கலாநிதி ஹரினி அமரசூரிய குறிப்பிட்டார்.

யுனெஸ்கோ பணிப்பாளர் நாயகம் ஓத்ரி அசூலே, இலங்கையின் புத்தசாசன, மதங்கள் மற்றும் கலாசார அலுவல்கள் அமைச்சர் கலாநிதி ஹிணிதும சுனில் செனவி உள்ளிட்ட இலங்கை தூதுக்குழுவினர் மற்றும் சர்வதேச நிபுணர்கள் இந்த மாநாட்டில் பங்கேற்றிருந்தனர்.

பிரதமர் ஊடக பிரிவு

உலக பாரம்பரிய சொத்துக்களில் ஒன்றான இலங்கையின் புனித நகரமான அனுராதபுரத்தையும் அதனுடன் தொடர்புடைய வாழ்வியல் பாரம்பரியத்தையும் பாதுகாப்பதற்கான ஒருங்கிணைந்த மற்றும் நிலையான அணுகுமுறை’ என்ற தலைப்பில் சர்வதேச நிபுணத்துவ மாநாட்டின் உயர் மட்டப் பிரிவில் பங்கேற்பதற்காக இலங்கைப் பிரதமர் கலாநிதி ஹரினி அமரசூரிய பிரான்ஸ் தலைநகர் பெரிசிற்கு உத்தியோகபூர்வ விஜயம் மேற்கொண்டுள்ளார். ஏப்ரல் முதலாம் திகதி செவ்வாய்க்கிழமை யுனெஸ்கோ தலைமையகத்தில் இந்த மாநாடு இடம்பெறவுள்ளது. யுனெஸ்கோவின் பணிப்பாளர் நாயகம் Audrey Azoulay அவர்களும் இந்த மாநாட்டில் பங்கேற்கவுள்ளார்.

இலங்கையுடன் இணைந்து யுனெஸ்கோ அமைப்பு இந்த மாநாட்டினை ஏற்பாடு செய்துள்ளது. யுனெஸ்கோவில் உலக பாரம்பரிய மரபுரிமை சொத்தாக கருதப்படும் கலாசார மற்றும் வரலாற்று முக்கியத்தும் வாய்ந்த அனுராதபுரத்தை பாதுகாப்பதற்கான நிலையான உத்திகளைப் பற்றி கலந்துரையாடுவதற்கென சர்வதேசத்தின் முன்னணி நிபுணர்களை இணைக்கும் சந்தர்ப்பமாக இது அமையவுள்ளது.

இந்த மாநாட்டின் ஒரு பகுதியாக, இரு தரப்பு ஒத்துழைப்பு மற்றும் பரஸ்பர ஆர்வத்தைக் கொண்டுள்ள பிரிவுகள் தொடர்பில் பிரான்ஸ் அரசாங்கத்தின் சிரேஷ்ட பிரதிநிதிகளுடனும் பிரதமர் கலந்துரையாடலில் ஈடுபடவுள்ளார்.

புத்தசாசன, மதங்கள் மற்றும் கலாசார அலுவல்கள் அமைச்சர் கலாநிதி ஹிணிதும சுனில் செனவி உள்ளிட்ட பிரதிநிதிகளும் இந்த விஜயத்தில் இணையவுள்ளமை குறிப்பிடத்தக்கது.

பிரதமர் ஊடகப் பிரிவு

இலங்கையிலும் உலகெங்கிலும் உள்ள முஸ்லிம் சகோதர சகோதரிகள் ஈதுல் பித்ர் நோன்புப் பெருநாளை கொண்டாடும் இவ் வேளையில், அமைதி, சுபீட்சம் மற்றும் ஆன்மீக ஈடேற்றத்திற்காக எனது மனமார்ந்த வாழ்த்துக்களை தெரிவித்துக் கொள்கிறேன்.

ஆழ்ந்த ஆன்மீக ஈடுபாடு, இறை வழிபாடுகள் மற்றும் சுய ஒழுக்கத்தினை அதிகரிக்கும் ரமழான் மாதம் இரக்கம், தாராள மனப்பான்மை மற்றும் ஒற்றுமை ஆகியவற்றின் பெறுமானங்களை எமக்குக் கற்பிக்கிறது. இந்த புனித மாதத்தில் எமது சகோதர முஸ்லிம் சமூகத்தினர் கடைபிடிக்கும் நோன்பு ஒரு வணக்க வழிபாடாக மட்டுமன்றி, எமது ஆதரவற்ற சகோதர சமூகத்தினர் எதிர்கொள்ளும் போராட்டங்களை எமக்கு நினைவூட்டுகிறது. அது குடும்பம், நண்பர்கள் மற்றும் சமூகத்துடனான எமது பிணைப்பை வலுப்படுத்தும் அதே வேளையில், பொறுமை, பணிவு மற்றும் நன்றியுணர்வு ஆகியவற்றை வளர்த்துக் கொள்வதற்கான சந்தர்ப்பமாகும்.

கருணை, மன்னிப்பு மற்றும் நற்பணிகளில் ஈடுபடல் போன்ற மனிதநேய செயற்பாடுகளையும் அது உட்பொதிந்துள்ளது. குறிப்பாக இக் காலப்பகுதியில் நிறைவேற்றப்படும் சகாத் மற்றும் சதகா ஆகிய நட்கருமங்கள் சமூகத்தில் தேவையுள்ளவர்களுடன் பகிர்ந்து கொள்வதன் முக்கியத்துவத்தை பிரதிபலிப்பதுடன், உண்மையான சுபீட்சம் என்பது அடுத்த மனிதர்கள் எழுந்து நிற்க உதவுவதாகும் என்பதை எமக்கு நினைவூட்டுகிறது.

இவை உலகளாவிய பெறுமானங்களாகும் என்பதுடன், முஸ்லிம்கள் மட்டுமின்றி அனைத்து சமூகங்களுடனும் மிக ஆழமாக பிணைந்திருக்க வேண்டியவையாகும். மேலும் இவை பல்வேறு சமயங்கள் மற்றும் நம்பிக்கை கோட்பாடுகள் மற்றும் சமூக பின்னணியில் உள்ள மக்களிடையே நல்லிணக்கத்தையும் புரிந்தணர்வையும் வளர்க்கின்றன.

நாம் வாழும் இலங்கைத் தேசம் பன்முகத்தன்மையினால் வளம்பெற்ற ஒரு தேசமாகும். பரஸ்பர மரியாதை மற்றும் ஒத்துழைப்பு மூலம் எமது எதிர்காலத்தை வலுப்படுத்த நாம் அனைவரும் ஒன்றிணைந்து செயற்பட வேண்டும். இந்த ஈகைத் திருநாள் எமக்கு நல்லிணக்கம், சகிப்புத்தன்மை, நீதி மற்றும் அமைதியை நோக்கி செயல்பட வேண்டியதன் அவசியத்தை நினைவூட்டுகிறது.

ரமழான் மாதம் மகிழ்ச்சியான ஈத் கொண்டாட்டத்துடன் நிறைவடைகின்ற போதிலும், அது நம்மிடம் விட்டுச் செல்லும் இரக்கம், ஒற்றுமை மற்றும் நற்பண்பு ஆகிய பெறுமானங்களை எமது அன்றாட வாழ்வில் இணைத்துக்கொள்ள பாடுபடுவோம். இந்த அருள் நிறைந்த மாதம் எமக்கும் முழு தேசத்திற்கும் அமைதி மற்றும் சுபீட்சத்திற்கான செய்தியைக் கொண்டு வரட்டுமாக!.

உங்கள் அனைவருக்கும் இனிய நோன்புப்பெருநாள் நல்வாழ்த்துக்கள்...!!!

கலாநிதி ஹரிணி அமரசூரிய
பிரதமர்
இலங்கை ஜனநாயக சோசலிசக் குடிய
2025 மார்ச் 31 ஆம் திகதி