பஸ் கட்டணங்களை வங்கிக் அட்டைகள் மூலம் செலுத்துவதற்கான ஏற்பாடுகள் மேற்கொள்ளப்படும்.

டிஜிட்டல் பொருளாதார மாதத்துடன் இணைந்ததாக செயற்கை நுண்ணறிவு பற்றிய aigov.lk எனும் உத்தியோகபூர்வ இணையத்தளம் அங்குராப்பணம் செய்து வைக்கப்படும் என்றும் , பஸ் கட்டணங்களை வங்கிக் அட்டைகள் மூலம் செலுத்துவதற்கான முறைமை ஒன்று உருவாக்கப்படும் எனவும் பிரதமர் கலாநிதி ஹரிணி அமரசூரிய தெரிவித்தார்.

பாராளுமன்ற உறுப்பினர் ஒருவர் எழுப்பிய கேள்விக்கு பதிலளிக்கும் வகையில் இன்று (10) பாராளுமன்றத்தில் பிரதமர் இதனைத் தெரிவித்தார்.

இதன்போது மேலும் கருத்து தெரிவித்த பிரதமர்

டிஜிட்டல் மயமாக்கலால் வலுவூட்டப்பட்ட நாடாக நமது நாட்டை மாற்றி அமைக்கும் பயணத்தை துரிதப்படுத்துவதற்கான தேசிய நிகழ்ச்சித்திட்டத்தின் ஒரு அங்கமாக செப்டம்பர் மாதம் டிஜிட்டல் பொருளாதார மாதமாக பெயரிடப்பட்டுள்ளது. குறிப்பாக, இது தொடர்பாக மக்கள் மத்தியில் விழிப்புணர்வை ஏற்படுத்துவதும், எதிர்கால டிஜிட்டல் பொருளாதாரத்தை கட்டியெழுப்புவதில் அரசாங்கத்தின் ஆர்வத்தை வெளிப்படுத்துவதும் இதன் நோக்கங்களில் ஒன்றாகும். செப்டம்பர் மாதத்தில் அதற்கான நிகழ்ச்சிகள் தொடர்ந்து செயல்படுத்தப்படும்.

இந்த நிகழ்ச்சிகளின் மூலம் டிஜிட்டல் கருவிகளை அடையாளம் காண்பது மற்றும் அவற்றைப் பயன்படுத்துவதன் முக்கியத்துவம் குறித்து பொதுமக்கள், வர்த்தகர்கள் மற்றும் நிறுவனங்கள் மத்தியில் விழிப்புணர்வை ஏற்படுத்துவதுடன், இ-அரச தளங்கள், டிஜிட்டல் முறைமையிலான நிதித் தீர்வுகள் மற்றும் செயற்கை நுண்ணறிவை அடிப்படையாகக் கொண்ட புத்தாக்கங்கள் சமூகத்தின் அனைத்து தரப்பினரும் பயன்படுத்தி பயனடைவதை துரிதப்படுத்துவதை இலக்காகக் கொண்டே இச் செயற்பாடுகள் முன்னெடுக்கப்பட இருக்கின்றன.

டிஜிட்டல் பொருளாதார அமைச்சு மற்றும் அதன் கீழ் வருகின்ற கூட்டு நிறுவனங்களால் செயல்படுத்தப்படும் டிஜிட்டல் திட்டங்களை துரிதப்படுத்துவதன் மூலம் அதன் நன்மைகளை குடிமக்களும் வர்த்தகர்களும் விரைவாக அடைவார்கள் என அரசாங்கம் எதிர்பார்க்கிறது. 2030ஆம் ஆண்டளவில் நாட்டின் டிஜிட்டல் பொருளாதாரத்தை அமெரிக்க டொலர் 15 பில்லியனாக அதாவது மொத்த உள்நாட்டு உற்பத்தியில் 12% ஆக டிஜிட்டல் பங்களிப்பை விரிவுபடுத்துவதற்கான அரசாங்கத்தின் சவாலான இலக்கை அடைவதுடன், டிஜிட்டல் துறையில் ஏற்றுமதியை அமெரிக்க டொலர் 5 பில்லியனாகவும், டிஜிட்டல் துறைசார் தொழிலாளர்களின் எண்ணிக்கையை இரண்டு இலட்சமாகவும் அதிகரிக்க வேண்டுமென எதிர்பார்க்கப்படுகிறது.

இந்த அபிலாஷைகளைத் தெளிவாக வெளிப்படுத்தும் வகையிலும், இலக்குகளை அடைவதற்காகவும் அரச மற்றும் தனியார் துறைகளை ஒன்றிணைத்து இந்த டிஜிட்டல் பொருளாதார மாதத்தை ஒரு தளமாக உருவாக்கப்படுகின்றது. தெற்காசிய பிராந்தியத்தில் தொழில்நுட்பப் புத்தாக்கம், டிஜிட்டல் மயமாக்கல் மற்றும் செயற்கை நுண்ணறிவை முதன்மையாகக் கொண்ட துறைகளின் வளர்ச்சிக்கு சிறந்த மையமாக இலங்கையை நிலைநிறுத்துவதும் இதன் மற்றொரு நோக்கமாகும்.

டிஜிட்டல் பொருளாதார மாதம் என்பது வெறுமனே ஒரு அடையாள முன்னெடுப்பு மாத்திரமல்ல, விழிப்புணர்வை அதிகரிப்பதன் மூலம் இலங்கையின் டிஜிட்டல் அபிலாஷைகளை உலகுக்கு வெளிப்படுத்துவதற்கான ஒரு நடைமுறைச் செயற்பாடாகும், அதன் மூலம் உருவாகும் புத்தாக்கம், செயல்திறன் மற்றும் வாய்ப்புகள் எதிர்காலத்தில் நாட்டு மக்களுக்கு நேரடி நன்மைகளை பெற்று கொடுப்பதற்கான ஒரு திட்டமுமாகும். அதற்கமைய, டிஜிட்டல் மயமாக்கல் குறித்த விழிப்புணர்வை ஏற்படுத்தும் நிகழ்ச்சிகள், கண்காட்சிகள், ஆரம்ப தொழில்முனைவுகள், தொழில்முனைவோர், புத்தாக்க சுற்றுச்சூழல் அமைப்புகளை காட்சிப்படுத்துதல் உள்ளிட்ட பல நிகழ்ச்சிகள் செப்டம்பர் 17, 18, 19, 20 ஆம் திகதிகளில் நடத்தப்படவிருக்கின்றன.

அதற்கான இலங்கை நிதி தொழில்நுட்ப மாநாடு, டிஜிட்டல் நிதி பயன்பாடுகளுக்குத் தம்மைப் தயார்படுத்திக் கொள்வதற்கான புதிய தீர்வுகளை ஊக்குவித்தல் ஆகியன செப்டம்பர் 24 மற்றும் 25 ஆம் திகதிகளில் நடைபெற இருக்கின்றது. செயற்கை நுண்ணறிவு தேசிய கண்காட்சி (National AI Expo) செப்டம்பர் 29 மற்றும் 30 ஆம் திகதிகளில் நடைபெற இருக்கின்றது. இந்த நூறு நாட்களில், டிஜிட்டல் மயமாக்கல் குறித்த தேசிய அளவிலான விழிப்புணர்வுகள், டிஜிட்டல் அரச சேவைகள் மற்றும் காகிதப் பயன்பாடற்ற தீர்வுகளை பொதுமக்களுக்கு அறிமுகப்படுத்தும் கண்காட்சிகள், டிஜிட்டல் கருவிகளின் நன்மைகள் குறித்து பரந்த விழிப்புணர்வை ஏற்படுத்துவதற்கான ஊடகப் பிரசாரம், திறன் மேம்பாடு மற்றும் கல்வி, டிஜிட்டல் திறன் மேம்பாடு, தொழில்முனைவு மற்றும் தொழில்நுட்பத்திற்கு தம்மை பழக்கப்படுத்திக்கொள்ளுதல் குறித்து இளைஞர்கள், சிறு மற்றும் நடுத்தர தொழில்முனைவோர் மற்றும் நிபுணர்களுக்கான பயிற்சி வகுப்புகள், செயலமர்வுகள், தகவல் மற்றும் தொடர்பாடல் தொழில்நுட்பம், டிஜிட்டல் சேவைகளின் எதிர்கால தொழில்களை ஊக்குவிப்பதற்கான பல்கலைக்கழகங்கள் மற்றும் பாடசாலைகள் ஒருங்கிணைப்பு நிகழ்ச்சிகள், இ-அரசு தீர்வுகள் குறித்த மாகாண மட்டத்திலான விழிப்புணர்வுகள், டிஜிட்டல் பொருளாதார சவால்கள் மற்றும் வாய்ப்புகள் குறித்து இத்துறை சார் முன்னோடிகள் மற்றும் கொள்கை வகுப்பாளர்களுடன் கலந்துரையாடல்கள், புத்திஜீவிகளின் கலந்துரையாடல்கள் ஆகியன நடத்த ஏற்பாடுகள் செய்யப்பட்டிருக்கின்றன.

அத்தோடு, டிஜிட்டல் மாதத்துடன் இணைந்து இலங்கை கணினி அவசர சேவை பதிலளிப்பு ஒன்றியத்தின் மூலம் தேசிய இணையப் பாதுகாப்பு நடவடிக்கைகளை ஆரம்பித்தல், தேசிய சான்றிதழ் அதிகார சபையின் நடவடிக்கைகளை ஆரம்பித்தல், தேசிய இணையப் பாதுகாப்பு மூலோபாயத்தை அறிமுகப்படுத்துதல், வாகன அபராதங்களை அந்த இடத்திலேயே செலுத்தக்கூடிய வகையில் அரசாங்கத்தின் டிஜிட்டல் கொடுப்பனவு தளமான govpayஐ விரிவுபடுத்துதல், பயணிகளுக்கு வங்கிக் அட்டைகள் மற்றும் QR குறியீடுகள் மூலம் பஸ் கட்டணத்தைச் செலுத்துவதற்கான தேசிய போக்குவரத்து கட்டண செலுத்தல் தளத்தை நிறுவுதல், அரசாங்கத்தின் உத்தியோகபூர்வ செயற்கை நுண்ணறிவு தளமாகிய aigov.lk-ஐ உத்தியோகபூர்வமாக அறிமுகப்படுத்துதல், டிஜிட்டல் பொருளாதார அனுபவ மையத்தை மேம்படுத்துதல், சிம் கார்டுகளைப் பதிவு செய்யும் தானியங்கி செயல்முறையை ஆரம்பித்தல், தொலைத்தொடர்பு ஒழுங்குபடுத்தல் ஆணைக்குழுவினால் 5G வசதிகளை அறிமுகப்படுத்துதல் போன்ற நடவடிக்கைகளுக்கும் ஏற்பாடு செய்யப்பட்டிருக்கின்றன.

டிஜிட்டல் பொருளாதார அமைச்சு தற்போது நாடு முழுவதும் டிஜிட்டல் மயமாக்கலுக்குத் தேவையான உட்கட்டமைப்புத் தேவைகள் குறித்து ஆய்வு மற்றும் பரிசோதனைகளை மேற்கொண்டு வருகிறது. நிதர்சனமாக, கல்வி அமைச்சு ஏற்கனவே மாகாண, கல்வி வலய, பாடசாலை மட்டத்தில் நிலவி வருகின்ற தேவைகளைக் கண்காணித்து வருகிறது. அதேபோன்று, டிஜிட்டல் மயமாக்கலுக்குத் தேவையான உட்கட்டமைப்பு வசதிகள் குறித்து ஆய்வு மேற்கொண்ட கல்வி அமைச்சும், டிஜிட்டல் அமைச்சும் இணைந்து தேவையான வசதிகளை வழங்குவதற்கான ஒரு திட்டத்தை வகுத்திருக்கின்றது. இதேபோல், ஏனைய அமைச்சுகளிலும் டிஜிட்டல் மயமாக்கலுக்கான பணிகள் முன்னெடுக்கப்பட்டு வருவதாகவும் பிரதமர் தெரிவித்தார்.

பிரதமர் ஊடகப் பிரிவு

கம்பஹா விக்ரமாராச்சி பல்கலைக்கழகத்தின் எந்தவொரு மாணவருக்கும் அநீதி ஏற்படாத வகையில் தீர்வுகளை வழங்க அரசு நடவடிக்கை எடுக்கும் என பிரதமர் கலாநிதி ஹரிணி அமரசூரிய தெரிவித்தார்.

பாராளுமன்ற உறுப்பினர் இராமநாதன் அர்ச்சுனா எழுப்பிய கேள்விக்கு பதிலளிக்கும் வகையில், இன்று (09) பாராளுமன்றத்தில் பிரதமர் இதனைத் தெரிவித்தார்.

அப்போது மேலும் கருத்து தெரிவித்த பிரதமர்,

கம்பஹா விக்ரமாராச்சி பல்கலைக்கழகம் தொடர்பாக நியமிக்கப்பட்ட குழு, தற்போது கற்பிக்கப்பட்டு வரும் பாடநெறிகளைப் பிற பல்கலைக்கழகங்களுடன் இணைத்துக் கற்பித்தல் அல்லது தற்போது கற்று வரும் பாடநெறிகளுக்கு இணையான பிற பல்கலைக்கழகங்களில் கற்பிக்கப்படும் பாடநெறிகளுடன் இணைத்தல், அதேபோன்று பல்கலைக்கழக நடவடிக்கைகளை தற்போது செயல்பட்டு வரும் விதத்திலேயே செயல்பட விடுவதோடு தேவையான வளங்கள் மற்றும் வசதிகளைப் பெற்றுக்கொடுப்பதன் மூலம் தற்போதைய பாடநெறிகளை முறையாகவும் தரமாகவும் செயல்படுத்துவது என இரண்டு பிரதான தீர்வுகளைப் பரிந்துரைத்திருக்கிறது.

இந்த இரண்டு பரிந்துரைகளில் மிகவும் பொருத்தமான பரிந்துரைகளைத் தேர்ந்தெடுப்பதற்காக, சம்பந்தப்பட்ட தரப்பினருடன் தற்போது பேச்சுவார்த்தைகள் நடத்தப்பட்டு வருகின்றன. இதற்குச் சிறிது காலம் தேவைப்படும். அதற்கமைய, ஒவ்வொரு பாடநெறிக்கும் மிகவும் பொருத்தமான பரிந்துரையைச் செயல்படுத்த நடவடிக்கை எடுக்கப்படும்.

எந்தவொரு மாணவருக்கும் அநீதி ஏற்படாத வகையில் தீர்வுகளை வழங்குவதே அரசாங்கத்தின் எதிர்பார்ப்பாகும். ஆகவே, முதலாவது குழுவின் பட்டப்படிப்பு முடிவடைவதற்குள் விரைவாகத் தீர்வுகளை வழங்க நடவடிக்கை எடுக்கப்படும்.

இவற்றில் எந்தப் பரிந்துரையைச் செயல்படுத்தினாலும், தற்போதுள்ள பாடநெறிகளின் சிறப்பம்சங்களை மாற்றலாகாது என குழு தீர்மானித்துள்ளது. இருப்பினும் குறிப்பிட்டதொரு பாடநெறி இந்த நாட்டில் இந்தப் பல்கலைக்கழகத்தில் திறம்படக் கற்பிக்கப்படுமாயின், அது தொடர்பில் சம்பந்தப்பட்ட தரப்பினருடன் கலந்தாலோசித்து, மிகவும் பொருத்தமான சிறப்பம்சத்தைக் கற்றுக்கொடுக்க நடவடிக்கை எடுக்கப்படும்.

சுதேச சுகாதார விஞ்ஞான மற்றும் தொழில்நுட்ப பீடம் (Faculty of Indigenous Health Sciences & Technology), BSc (Hons) in Indigenous Medicinal Resources, BHSc (Hons) in Indigenous Pharmaceutical Technology ஆகிய பட்டப்படிப்புகளின் பாடத்திட்டத்தை பொருத்தமான வகையில் மாற்றுவதற்காக சம்பந்தப்பட்ட பங்குதாரர்களுடன் (Stakeholders Consultations) 2025.07.25 அன்று கலந்துரையாடல்கள் நடத்தப்பட்டன. ஏனைய கற்கைநெறிகளுக்கும் இத்தகைய கலந்துரையாடல்களை நடத்துமாறு மேற்குறிப்பிட்ட குழு பரிந்துரை செய்திருக்கின்றது.

பட்டப்படிப்புகளுக்கான வேலைவாய்ப்புகளை வழங்குவது தொடர்பாக தொழில் வாய்ப்பு வழங்குனர்களை (Employers) அடையாளம் காண நடவடிக்கை எடுக்கப்பட்டு வருகிறது. அவ்வாறான வேலைவாய்ப்புகள் காணப்படாத அல்லது பிரச்சனைகள் காணப்படுகின்ற கற்கைநெறிகளை வேலைவாய்ப்புகளை உருவாக்கும் விதத்தில் சீர்திருத்தல் அல்லது வேலைவாய்ப்புகளை உறுதி செய்யக்கூடிய பாடத்திட்டங்களுக்கு மாணவர்களை உள்வாங்க நடவடிக்கை எடுக்கப்பட்டு வருகிறது.

பல்கலைக்கழகத்தில் நிலவி வருகின்ற இடவசதி பற்றாக்குறைக்கு விரைவாகத் தீர்வு காண தற்போது ஏற்பாடுகள் செய்யப்பட்டுள்ளதாகவும், நுகேகொடையில் அமைந்திருக்கும் பீடத்தைக் கம்பஹாவில் தேவையான இடவசதிகள் இருக்கின்ற இடத்திற்குக் கொண்டு செல்வதற்குத் தேவையான நடவடிக்கை எடுக்கப்படும் என்றும் பிரதமர் மேலும் தெரிவித்தார்.

Faculty of Indigenous Health Sciences & Technology, Faculty of Indigenous Social Science & Management மற்றும் Faculty of Graduate Studies ஆகிய பீடங்களுக்கு புதிய மாணவர்களை உள்வாங்குவதை தற்காலிகமாக இடைநிறுத்துமாறு பல்கலைக்கழக மானியங்கள் ஆணைக்குழுவிற்கு (University Grants Commission) ஆலோசனை வழங்கப்பட்டிருக்கின்றது.

அத்தோடு பல்கலைக்கழக விரிவுரையாளர்களை சேவையில் இணைத்துக் கொள்ளும்போது ஏற்பட்டிருக்கும் மோசடிகள் குறித்து விசாரணைகளை மேற்கொண்டு அதற்கான சட்ட நடவடிக்கை எடுக்கப்படும் எனவும் பிரதமர் தெரிவித்தார்.

பிரதமர் ஊடகப்பிரிவு

விஞ்ஞானம் மற்றும் தொழில்நுட்ப அமைச்சினால் பாடசாலைகள் மத்தியில் 100 புத்தாக்க சங்கங்களை நிறுவும் தேசிய வேலைத்திட்டம், பிரதமர் கலாநிதி ஹரிணி அமரசூரிய மற்றும் விஞ்ஞானம் மற்றும் தொழில்நுட்ப அமைச்சர் பேராசிரியர் கிரிஷாந்த அபேசேன ஆகியோரின் தலைமையில் செப்டெம்பர் 8ஆம் திகதி கொழும்பு பல்கலைக்கழக மருத்துவ பீட கேட்போர் கூடத்தில் நடைபெற்றது.

இந்நிகழ்வில், இப் புத்தாக்க சங்கங்களை உத்தியோகபூர்வமாக ஆரம்பிப்பதைக் குறிக்கும் வகையில் நாட்டின் அனைத்து மாகாணங்களையும் பிரதிநிதித்துவப்படுத்திய 9 பாடசாலைகளுக்கு, பிரதமரின் கையால் புத்தாக்க நினைவுச் சின்னங்கள் வழங்கி வைக்கப்பட்டன.

புத்தாக்கங்களை ஊக்குவிப்பதன் மூலம் தேசிய பொருளாதாரத்திற்கு வழங்கக்கூடிய பங்களிப்பு, பாடசாலை மட்டத்திலான புத்தாக்க வாய்ப்புகள் மற்றும் சவால்கள், புத்தாக்கச் சங்கங்களை உருவாக்குவதில் ஆசிரியர்களின் பங்களிப்பு, புதிய கண்டுபிடிப்புகளுக்கான காப்புரிமைகளைப் பெறுவதன் முக்கியத்துவம், மற்றும் கல்விச் சீர்திருத்தங்கள், புதிய கண்டுபிடிப்புகள், மற்றும் புத்தாக்கங்கள் மூலம் ஒரு படைப்பாற்றல் மிக்க தொழிலாளர் படையை நாட்டில் உருவாக்குதல் ஆகிய முக்கிய விடயங்கள் பற்றி இந்நிகழ்வில் விரிவாகக் கலந்துரையாடப்பட்டன.

நிகழ்வில் உரையாற்றிய பிரதமர்,

புதிய உலகில் உள்ள பிரச்சினைகளுக்குத் தீர்வுகளைக் காணக்கூடிய ஒரு புதிய தலைமுறையை உருவாக்குவதன் முக்கியத்துவத்தை வலியுறுத்தினார். அப்போது, நடைமுறையில் உள்ள பாரம்பரியக் கல்வி முறைக்கு அப்பாலான புதிய கல்வி முறையின் அவசியத்தையும் அவர் சுட்டிக்காட்டினார். மேலும், புதிய கண்டுபிடிப்பாளரின் மதிப்பு என்பது அவர்களின் கல்வித் தகுதிகள், பெற்றிருக்கும் பட்டம், அல்லது தனதாக்கிக் கொண்டிருக்கும் காப்புரிமைகளின் எண்ணிக்கையை அடிப்படையாகக் கொண்டது அல்ல என்றும், நிகழ்கால சமூகத்தை மேலும் சிறப்பாக மாற்றி அமைப்பதற்கு புதிய கண்டுபிடிப்பாளர் வழங்கும் பங்களிப்பே மிக முக்கியமானது என்றும் பிரதமர் குறிப்பிட்டார்.

சமூகம் பற்றிய உணர்வையும், சமூகத்தின் மீதான பொறுப்புணர்வையும் கொண்ட, இரக்கமும் மனிதாபிமானமும் மிக்க புதிய கண்டுபிடிப்பாளர்களை உருவாக்குவதற்குத் தேவையான சூழலை உருவாக்குவதும், அவர்களை ஊக்குவிப்பதும் அரசாங்கத்தின் பொறுப்பு எனவும் பிரதமர் தெரிவித்தார்.

"எனக்குத் தேவைப்படுவது தரவுகளைப் பற்றி அறிந்த ஒரு தலைமுறை மாத்திரம் அல்ல. அந்தத் தரவுகளின் உண்மைத்தன்மை, நம்பகத்தன்மை ஆகியவற்றை உறுதிப்படுத்திக் கொள்ளக்கூடிய, ஆழ்ந்த அறிவையும் புதிய கண்ணோட்டத்தையும் கொண்டுள்ள, திரட்டப்பட்ட தரவுகளையும் வெறும் புத்தக அறிவையும் பயன்படுத்தி உலகத்தை மாற்றியமைக்கக்கூடிய மனப்பான்மையும் படைப்பாற்றலும் மிக்க ஒரு தலைமுறையே நமக்குத் தேவைப்படுகிறது. புதுவிதத்தில் சிந்தித்து, ஒரு விடயத்தை புதிய கண்ணோட்டத்தில் பார்த்து, கிடைத்திருக்கும் தரவுகள், தகவல்கள் ஆகியவற்றை தமது அறிவை முன்னிலைப்படுத்தி செயல்படத் தெரிந்த, இந்த உலகம் பற்றிய ஆர்வத்தைக் கொண்ட திறமைசாலிகளே நமக்குத் தேவைப்படுகின்றனர்" என பிரதமர் மேலும் தெரிவித்தார்.

இந்நிகழ்வில் உரையாற்றிய விஞ்ஞான மற்றும் தொழில்நுட்ப அமைச்சர் பேராசிரியர் கிரிஷாந்த அபேசேன, புதிய கண்டுபிடிப்புகளை உருவாக்குவதன் முக்கியத்துவம் பற்றியும், அப்பணியில் விஞ்ஞான மற்றும் தொழில்நுட்ப அமைச்சிற்கும், கல்வி அமைச்சிற்கும் உள்ள பொறுப்புகள் பற்றியும் சுட்டிக்காட்டினார். அத்தோடு, இந்த நாட்டிற்கு இருக்கும் விசேடமான சொத்து, நாட்டிற்காக புதிய கண்டுபிடிப்புகளை உருவாக்கி அதற்காக எதிர்காலத்தில் கனவு காணும் ஒரு புதிய தலைமுறையே எனக் கூறிய அமைச்சர், புதிய கண்டுபிடிப்புகளுக்குத் தேவையான உச்சகட்ட ஒத்துழைப்பை மாணவர்களுக்கு வழங்குவதற்கு அரசாங்கம் என்ற வகையில் தேவையான நடவடிக்கைகளை எடுக்கத் தயாராக இருப்பதாகவும் மேலும் தெரிவித்தார்.

இந்த நிகழ்வில் பல்கலைக்கழக மானியங்கள் ஆணைக்குழுவின் தலைவர் சிரேஷ்ட பேராசிரியர் கபில செனவிரத்ன, கல்வி, உயர்கல்வி மற்றும் தொழில் கல்வி அமைச்சின் செயலாளர் நாலக களுவெவ, விஞ்ஞானம் மற்றும் தொழில்நுட்ப அமைச்சின் செயலாளர் வை.எல். மொஹமட் நவவி, இலங்கை புதிய கண்டுபிடிப்பாளர்கள் ஆணைக்குழுவின் ஆணையாளர் பேராசிரியர் வெரஞ்ச கருணாரத்ன உள்ளிட்ட விருந்தினர்கள், அதிபர்கள், ஆசிரியர்கள் மற்றும் புதிய கண்டுபிடிப்புகளை உருவாக்கி வரும் பாடசாலை மாணவர்கள் ஆகியோரும் கலந்துகொண்டனர்.

பிரதமர் ஊடகப்பிரிவு

உலக நீர்விளையாட்டு மற்றும் ஆசிய ஒலிம்பிக் சபையின் பணிப்பாளர் நாயகம் கேப்டன் ஹுசைன் அல் முசல்லம், பிரதமர் கலாநிதி ஹரிணி அமரசூரிய ஆகியோருக்கு இடையேயான சந்திப்பு, செப்டம்பர் 8 அன்று பிரதமரின் அலுவலகத்தில் நடைபெற்றது.

இச்சந்திப்பின்போது, விளையாட்டு வீரர்களின் மேம்பாடு மற்றும் விளையாட்டுத் துறையின் வளர்ச்சிக்கு அரசாங்கத்திற்கும் விளையாட்டுத் துறைக்கும் இடையிலான ஒத்துழைப்பின் முக்கியத்துவத்தை கேப்டன் ஹுசைன் அல் முசல்லம் வலியுறுத்தினார். மேலும், தற்போதுள்ள விளையாட்டுச் சட்டம் தொடர்பான சிக்கல்களுக்குத் தீர்வு காண்பதின் அவசியத்தையும், தேவையான புதிய சட்டங்களை அறிமுகப்படுத்த வேண்டியதன் தேவையையும் எடுத்துரைத்தார்.

அப்போது, பாடசாலை மாணவர்களிடமும் சமூகத்திலும் விளையாட்டை ஊக்குவிப்பதன் மூலம் நன்னடத்தையும் ஆரோக்கியமும் வளரும் என்று பிரதமர் கூறினார்.

அத்தோடு, விளையாட்டுத் துறையின் உட்கட்டமைப்பை மேம்படுத்துதல், ஊழல் எதிர்ப்பு நடவடிக்கைகள், விளையாட்டு வீரர்களுக்குப் பாதுகாப்பு அளித்தல், குறிப்பாகப் பெண்களின் பங்கேற்பில் கவனம் செலுத்துதல் போன்றவற்றில் அரசாங்கம் முன்னுரிமை அளித்து முதலீடு செய்து வருவதாகவும் குறிப்பிட்டார். எதிர்காலத்தில் கல்வி அமைச்சகத்துடன் இணைந்து நீர்வழி விளையாட்டுத் துறையை மேம்படுத்த நடவடிக்கை எடுக்கப்படும் என்றும் பிரதமர் வலியுறுத்தினார்.

இந்தச் சந்திப்பில், தேசிய ஒலிம்பிக் குழுவின் (NOC) தலைவர் சுரேஷ் சுப்ரமணியமும் கலந்துகொண்டார்.

பிரதமர் ஊடகப் பிரிவு

இலங்கையிலும் உலகெங்கிலும் வாழும் இஸ்லாமிய அன்பர்கள், முஹம்மது நபிகள் (ஸல்) நாயகம் அவர்களின் பிறந்தநாளைக் கொண்டாடுவதை முன்னிட்டு எனது மனமார்ந்த நல்வாழ்த்துகளைத் தெரிவித்துக்கொள்கிறேன்.

நபிகள் நாயகம் அவர்களின் போதனைகள் வெறும் மதக் கோட்பாடுகளுக்கு மட்டும் வரையறுக்கப்பட்டவை அல்ல; மாறாக, முழு மனிதகுலத்திற்கும் நன்மையளிக்கும் உலகளாவிய மனிதநேயக் கோட்பாடுகளாகும். குறிப்பாக, சமூக நீதி, சமத்துவம், ஒடுக்கப்பட்டவர்கள் மீதான இரக்கம் மற்றும் ஆட்சியாளர்களின் பொறுப்புக்கூறல் பற்றிய அவர்களின் போதனைகள் இன்றைய சமூகத்திற்கு முன்னெப்போதையும் விட மிகவும் பொருத்தமானவையாகும்.

அக்காலத்தில் சமூகத்தில் நிலவிய அநீதியும் ஊழலும் நிறைந்த அமைப்புகளுக்கு எதிராக எழுந்த ஒரு புரட்சிகரமான கொள்கையாகவே அவர்களின் செய்தி அமைந்திருந்தது. மேலும், அது ஒரு மனிதன் மற்றொரு மனிதனைச் சுரண்டாத, அனைவரும் கண்ணியத்துடன் வாழக்கூடிய ஒரு சமூகத்தைக் கட்டமைப்பதற்கான உன்னதமான நோக்கத்தைக் கொண்டிருந்தது.

ஒரு நாடாக நாம் புதிய சமூக மாற்றத்தை எதிர்பார்க்கும் இந்தத் தருணத்தில், ஊழலும் ஏற்றத்தாழ்வும் அற்ற நீதியான ஆட்சி பற்றிய அந்தப் போதனைகள் நமக்கு மிகுந்த வலிமையையும் உத்வேகத்தையும் தருகின்றன.

இலங்கையின் முன்னேற்றத்திற்கு முஸ்லிம் சமூகம் ஆற்றியுள்ள வரலாற்று முக்கியத்துவம் மிக்க பங்களிப்பை நான் மிகுந்த மதிப்புடன் நினைவுகூர்கிறேன். இந்த உன்னதமான போதனைகளை முன்மாதிரியாகக் கொண்டு, அனைத்து மக்களுக்கும் நீதி கிடைக்கப்பெறும், மனிதநேயமும் செழிப்பும் மிக்கதோர் தேசத்தைக் கட்டியெழுப்ப ஒன்றிணையுமாறு உங்கள் அனைவரையும் அழைக்கின்றேன்.

அனைவருக்கும் அமைதியும் மகிழ்ச்சியும் நிறைந்த மீலாதுன்-நபி தினமாக அமையட்டும்!

கலாநிதி ஹரிணி அமரசூரிய
பிரதமர்
இலங்கை சனநாயக சோசலிசக் குடியரசு
2025 செப்டம்பர் 05

பிரதமர் கலாநிதி ஹரிணி அமரசூரிய மற்றும் இத்தாலியின் வெளிநாட்டு அலுவல்கள் மற்றும் சர்வதேச ஒத்துழைப்புக்கான பிரதி இராஜாங்க செயலாளர் மரியா திரிபோடி (Maria Tripodi) ஆகியோருக்கு இடையிலான சந்திப்பு செப்டெம்பர் 4 ஆம் திகதி அலரி மாளிகையில் இடம்பெற்றது.

அரசியல் கலந்துரையாடல்களுக்கான வாய்ப்பை அதிகரிப்பது, வர்த்தக மற்றும் முதலீட்டு ஒத்துழைப்பை விரிவுபடுத்துவது, சுற்றுலாத்துறையை மேம்படுத்துவது மற்றும் கலாசார மற்றும் கல்விப் பரிமாற்றங்களை வலுப்படுத்துவது குறித்து இச்சந்திப்பின் போது கவனம் செலுத்தப்பட்டது.

பலமான பொருளாதாரத்தை கட்டியெழுப்புதல், மக்களின் நம்பிக்கையை உறுதிப்படுத்துதல் மற்றும் ஊழலற்ற ஒரு நிலையான தேசத்தை முன்னேற்றுவதற்கான தற்போதைய அரசாங்கத்தின் வேலைத்திட்டம் குறித்து பிரதமர் இங்கு வலியுறுத்தினார்.

ஐரோப்பிய ஒன்றியத்துடன் தற்போதுள்ள உறவுகளை மேலும் வலுப்படுத்துவதன் முக்கியத்துவத்தையும், இத்தாலியுடனான நீண்டகால நட்பைப் பாராட்டியும் சர்வதேச மன்றங்களில் இலங்கைக்கு ஆதரவளிப்பது குறித்தும் பிரதம மந்திரி கருத்துத் தெரிவித்தார். இலங்கையின் அண்மைய முன்னேற்றங்களை திரிபோடி (Maria Tripodi ) பாராட்டினார்.

அத்துடன், தற்போதைய வேலைத்திட்டங்களுக்கு இத்தாலியின் தொடர்ச்சியான ஆதரவை வழங்குவதாகவும் தெரிவித்தார்.

இலங்கைக்கான இத்தாலிய தூதுவர் டாமியானோ பிராங்கோவிக் (Damiano Francovig) உள்ளிட்ட இத்தாலிய அரசாங்கத்தை பிரதிநிதித்துவப்படுத்திய சிரேஷ்ட அதிகாரிகள் குழுவினர், பிரதமரின் செயலாளர் பிரதீப் சப்புதந்திரி, பிரதமரின் மேலதிக செயலாளர் சாகரிகா போகாவத்த, வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலா அமைச்சின் ஐரோப்பா மற்றும் வட அமெரிக்கப் பிரிவின் பணிப்பாளர் நாயகம் சுகீஷ்வர குணரத்ன, அதே அமைச்சின் ஐரோப்பா மற்றும் வட அமெரிக்கப் பிரிவின் பணிப்பாளர் இசூரிகா கருணாரத்ன ஆகியோரும் இந்நிகழ்வில் கலந்துகொண்டனர்.

பிரதமர் ஊடகப் பிரிவு