පේරාදෙණිය විශ්වවිද්‍යාලයේ සමාජ සමානාත්මතාව සඳහා ජාත්‍යන්තර තරුනයෝ සහ ශිෂ්‍යයෝ (IYSSE) විසින් සිදුකිරීමට නියමිතව තිබූ දේශනය අවලංගු කිරීමේ කටයුත්ත කෙරෙහි අග්‍රාමාත්‍යවරියගේ හෝ අධ්‍යාපන අමාත්‍යංශයේ කිසියම් සම්බන්ධයක් ඇතැයි කෙරෙන චෝදනාවන් අග්‍රාමාත්‍ය කාර්යාලය තරයේ ප්‍රතික්ෂේප කරයි. ආචාර්ය හරිනි අමරසූරිය අධ්‍යාපන ආයතනවල ආන්දෝලනාත්මක කතිකාවන් සිදුකිරීම සඳහා මූලික වන ශාස්ත්‍රීය නිදහස සහ ප්‍රජාතන්ත්‍රවාදී අවස්ථාවන් ඇතිකරලීම සඳහා අඛණ්ඩව අනුග්‍රහය දක්වා ඇත.
දේශනය අවලංගු කිරීමට විශ්වවිද්‍යාලය ගත් තීරණයට අගමැති සහ අධ්‍යාපන ඇමැති ලෙස ආචාර්ය හරිනි අමරසූරිය විසින් බලපෑම් කළ බවට එල්ල වන චෝදනා සම්පූර්ණයෙන්ම පදනම් විරහිත සහ නොමඟ යවන සුළුය. උත්සවය සම්බන්ධයෙන් මෙම කාර්යාලයෙන් කිසිදු නියෝගයක් හෝ උපදෙසක් නිකුත් කර නොමැත. සියලු අධ්‍යයන ආයතනවල ස්වාධීනත්වය ආරක්ෂා කිරීමට රජය කැපවී සිටී. විශ්ව විද්‍යාල රජයේ ප්‍රතිපත්ති විවේචනය කිරීම ඇතුළුව විවිධ මත නිදහසේ ප්‍රකාශ කළ හැකි සහ මර්දනයට බියෙන් තොරව සාකච්ඡා කළ හැකි ස්ථාන ලෙස පැවතිය යුතුය.
එසේ වුවද, අධ්‍යයන අවකාශයන් තුළ ප්‍රජාතන්ත්‍රවාදී ප්‍රකාශනයට හා විවෘත සංවාදයට අකුල් හෙලන යම් ක්‍රියාවක් වෙතොත් අපි ඒ පිළිබඳ කණගාටුව පළ කරමු.
ආචාර්ය හරිනි අමරසූරිය ශිෂ්‍යයන්ගේ සහ අධ්‍යාපනඥයින්ගේ අර්ථවත් හා විවේචනාත්මක කතිකාවක නියැලීමේ අයිතීන් ආරක්ෂා කිරීම සඳහා ඇයගේ සහය ලබා දෙන්නීය. විශ්ව විද්‍යාල ප්‍රජාවේ සහ මහජනතාවගේ විශ්වාසය පවත්වා ගැනීම සඳහා මෙම ප්‍රතිපත්ති ආරක්ෂා කිරීම අත්‍යවශ්‍ය වේ.
එස්. විජිතා බස්නායක.
මාධ්‍ය ලේකම්,
අග්‍රාමාත්‍ය සහ අධ්‍යාපන අමාත්‍යවරියගේ කාර්යාලය.
